Laal Ishq

LAAL ISHQ

Pancham restaurant men charo taraf chahal pahal hai koi aa raha hai to kai ja raha  hai koi waiter ko bula kar order de raha hai to kahin waiter khane aur naste ki plate liye ja raha hai, lekin pichhe kone ki seat par ekdam khamoshi hai. Ek laraka aur ek laraki to baithe hai lekin donon ke bich sannata hai. Laraki ki aankhon se lagatar aansoon bah rahe hai aur laraka afsosh aur becharagi ke sath baitha hai. In donon ke name hai Rekha(22) aur Madhukar(25).

Donon ek dusare se bahut pyar karate hain, bachapan ke dost hain, ek hi muhalle ke rahane vaale hain, sath sath hi khelate khate bare huye hain.

Madhukar- please Rekha… samajhane ki koshish karo… main bhi tumase bahut pyar karata hoo lekin main… apane parivaar se bhi bahut pyar karata hoo…. Main papa ka vishvaas nahin tor sakata…. Mujhe laga tha ki main sabako hamare bare men mana lunga… lekin main kamayaab nahin huaa.

Rekha- (sisakate huye) tum jhooth bol rahe ho…tumane mujhe cheat kiya hai…please Madhu main tumhare bina mar jaaungi please … please is shadi se inakar kar do… main tumhare bina nahin ji sakati please…., rone lagati hai aas paas ke log dekhane lagate  hain to Madhukar ko sharmindagi si mahashoosh hoti hai, vo Rekha ko chup karavaane ki koshish karata hai- Rekha yeh kya kar rahi ho please chup ho jao yaar… sab dekh rahe hain…, mammy ko to tum pahale se hi bilkul pasand nahin thi meri ummid sirf papa se hi thi … jab tak main bat karata vo mera rishta tay kar chuke the… mujhe to is bare men kuchh pata hi nahin tha… yakin karo mera….

Rekha kuchh bhi sunane ko taiyaar nahin thi vo apani taraf se koi kasar nahin chhorana chahati thi. Usane Madhukar se giragira kar kaha- ab to pata ho gaya na ab to mana kar do….

Madhukar ki bhi apani majboori thi vo Rekha ko samajhate huye bola- kaise mana kar doon tum to mere papa ko achchhi tarah se janati ho… unake liye pran jay par vachan na jaye … aur tumhin batao unhonne apane tarbiyat par yakin karake apane dost ko han kaha hai… fir main unake is yakin ko kaise tor doon… tumhin batao…?

Main kuchh nahin janati main bas etana janati hoo ki main tumhare bagair ji nahin paungi….Rekha ne Madhukar se saf saf kah diya lekin shayad Madhukar men etani himmat nahin thi ki vo es shadi se enakar kar ke Rekha aura pane bare me batata. Ek lambi bahash ke bad bhi koi natija nahin nikala. Rekha madhukar se sachcha pyar karati thi aur usake bagair jine ka soch bhi nahin sakati thi lekin Madhukar ke bujdili ka kya karati. Unaka rishta etana aage barh chuka tha ki ab Rekha ke liye move on karana possible nahi tha.

Madhukar ke papa Madhusoodan ek aadarshvaadi kattar insan the jo kah diya vo karana hai lekin galat na kahana hai na karana hai. Unhonne apane ek sahkarmi dost ki laraki Shalini se Madhukar ki shadi tay kar diye, unhen laga ki mera beta hai meri marji ke khilaf nahin jayega . lekin Madhukar ki mammy ko shak tha ki Madhukar aur Rekha ke bich men jaroor kuchh chal raha hai. Unhen apane bete men kami nahin najar aati thi unhen lagata tha ki Rekha hi Madhukar par dore dal rahi hai. Isliye vo Rekha ko pasand nahin karati thi aur Madhurima ko lagata ki mammy ka bhram hai vo donon sirf bachapan ke dost hain… bas.

Madhukar se milane ke bad Rekha bilkul toot si gi thi. Vo lar let sabase… agar Madhukar pichhe na hatata. Jab Madhukar ne hi sath chhor diya tab Rekha kya karati bas chhatapata kar rah gai. Vo sari baaten yaad aane lagi jo usane Madhukar ke sath bitai thi. Javani men kadam rakhane ke sath us pahale ahasas se lekar es aakhiri dard tak. Har baat usake jehan men toofan machati rahi aur vo tarapati rahi chhatapatati rahi.

Us din pahali baar ek bachapan ka dost achanak se alag lagane laga jab Madhukar ko dekh kar dharakanen tandav karane lagi thi. Jis Madhukar ke sath khelati thi ab usake samane bhar hone se sharir men ek sharsarahat si hone lagati thi. Ek din Rekha Madhurima se milane aai thi lekin vo mammy ke sath shopping karane gai thi. Ghar par sirf Madhukar hi tha, jab samane pari to kadam khud hi ruk gaye . uchhal kar aati hui Rekha tham si gai, dharakanen munh ko aane lagi, sharir men sarasaraahat kanpkapahat sab hone lagi, jaise pairon men jan hi na rahi ki vo aage barhe aur bhag jay. Aur yahi sthiti Madhukar ki bhi thi, vo apani dhun men chala ja raha tha ki Rekha ko dekhate hi kadam dagamagane lage. Dagamagate kadamon se dhire dhire vo Rekha ke paas pahuncha. Kuchh kahane ki sthiti men donon nahin the, aavaj jaise taloo se chipak si gai thi. Bat to man men chal rahi thi ki main Madhurima se milane aai thi kahan hai vo? Lekin jaban se ek bhi shabd nahi foot rahe the. Aur Madhukar ke man men bat thi ki kahan ja rahi ho tum…?

v..vo…m…main …m…madhu…..aavaj jaise taloo se chipak gai thi  kitani mushkil se bahar nikali.

Madhukar bhi gala tar karake bola- v…vo…n…nahin…hai….

Eske bad Rekha vahan se bhagana chahi jyon hi palati Madhukar ne aage barh kar usaka hath pakar liya aur khich kar gale se laga liya. Rekha to shoonya ho gai ki kya aur kaise huaa. Aur jab hosh aaya to vo usake hotho ki taraf barh raha tha kiss karane ko, lekin Rekha ne munh fer liya. Madhukar samajh gaya ek chhan ko ruka fir apani or ghuma kar mathe ko choom liya.

Main… chalati ...hoo… . Rekha ne kanpati aavaj men kaha aur vahan se daurati hui bhag gai. Vo din usake liye bahut khas tha din bhar yoon hi muskurati rahi. Aur Madhukar khud ko shishe men dekhakar sochane laga ki mainne yeh kya kiya. Aur gale lagane vali bat yaad aate hi usake hotho par bhi haya ki muskurahat fail jati thi. Fir mobile hatha men liya to yun hi Rekha ka number dial ho gaya.

Rekha ne turant phone utha bhi liya lekin kuchh boli nahin. Madhukar ne apane dil ki sari bat bata di- hello… Rekha…gussa ho kya? …yaar pata nahin vo sab kaise ho gaya… lekin… ek baat bataun tumhen … tumhen pata hai tumhen dekhate hi meri  dharakanen bahut tej ho jati hain ek ajib si bechaini si hone lagati hai… mere poore sharir men ek sarsharahat si hone lagati hai… tumhen pata hai aisa kyon hota hai? Rekha ne sirf nahin kaha fir Madhukar ne kaha – mujhe lagata hai ki mujhe tumase pyar ho gaya hai…tumhen kya lagata hai…?

Mujhe bhi lagata hai. Rekha ne kaha fir do dost lover ban gaye. Madhukar ne kitane romantic andaaj se Rekha ko propose kiya tha sabake saamane antaksahri ke maadhyam se aur esi samay se Madhukar ki mammy ko Rekha par shak bhi huaa tha.

Aise hi kitana achchha chal raha tha sab ki do din se Rekha ki zindagi jaise tham si gai hai jabase pata chala hai ki Madhukar ki shadi tay ho gai hai. Ab use aage andhakar dikhai de raha hai vo Madhukar se door rah kar jine ki soch bhi nahin sakati thi ab usake liye zindagi se jyada aasan maut lag rahi thi.

Roj ki tarah aaj bhi taiyaar hui college jane ke liye aur fir vapas jinda nahin lauti. Janboojhakar ek truck ke niche aa gai jisase usaki mauke par hi maut ho gai. Ishq aur mushq chhipaye nahin chhipata dabe munh in donon ki bhi baten hone lagi, kuchh log yakin karate kuchh kahate jhoothi afavaah hai aur kuchh log to mirch masaala laga kar usaka roop hi badal dete.

Es ghatana ko ek mahina ho gaya aur Madhukar ki shadi ka din  bhi aa gaya. Madhkar ka ghar saja huaa hai shadi ki taiyariyan joro par hai aur Madhukar ko har jagah har kisi men Rekha dikhai de rahi hai. Kabhi lagata bhram hai kabhi lagata ki vo pagal ho gaya hai aur kabhi sochata ki Rekha ki maut ka jimmedar vahi hai kyonki Rekha jab bhi milati to use hi apani maut ka jimmedar manati thi. Haldi lagate samay bhi Rekha dikhi to vo uthakar khara ho gaya sabake kahane par baitha. Taiyar hote samay bhi Rekha aai thi vah bhi laal jore men, usane kaha aaj hamari shadi hai aaj ham ek ho jayenge.

Madhukar shant tha ek dam shant. Kya ho raha hai use kuchh pata hi nahin chal raha hai vo to bas jo sab kahate hain vahi kar raha hai. Madhukar ki halat sabako najar aa rahi hai lekin koi kya karata Rekha to chali gai aur ab Madhukar ko sambhalane ke liye Shalini ke alava  aur koi nahin ho sakata hai.

Barat chali dhoom dham se vyahane lekin kuchh to khali khali sa lag raha hai. Madhukar gumsum sa jaise koi machine hai koi feelings nahin koi excitement nahin.

Jaymaal par jab Shalini ko aate dekha to laga Rekha aa rahi hai, chaukanna ho gaya fir vahi sarsarahat si hui dhrakanen bhi tej huin poore sharir men bijali si daur gai aankhen thori bari ho gai lekin agale pal Shalini dikhai di sab kuchh fir shant ho gaya. Jaymaal bhi ho gaya pata hi nahin chala. Shadi ke mandap men bhi Rekha laga ki bagal men baithi hai, jab lagata Shalini baithi hai to vo mandap ke bahar jati hui dikhati.  Sindoordan ke samay jab Madhukar sindoor pahnaane ko utha to laga Rekha hai, hath ruk gaye, sab bole kya huaa tab hosh aaya to Shalini hai.

Bidaai ho gai Shalini ko lekar Madhukar ghar ki or chala. Baki gariyan pichhe hai dulha dulhan ki gari aage hai. Aur fir us jagah pahunchi jahan Rekha ka accident huaa tha. Madhukar ne Rekha ko usi jagah par khara dekha jo vaise hi laal jore men khari hai. Madhukar ne driver se kaha- are bacho…. Driver kuchh samajh nahin paya gari unbalance hui aur samane se aati hui truck men ja ghusi, bilkul usi jagah jahan Rekha ka accident huaa tha. Aaj bilkul usi jagah par Madhukar hai aur bagal men Shalini bhi khoon se latpath pari hai. Shalini to turant khatm ho gai lekin Madhukar ki sanse abhi tak chal rahi hain. Usane aankh kholi to samane Rekha thi.

Tab tak baki gariyan bhi aa gai, sab log daure. Koi Shalini ke paas pahuncha to koi Madhukar ke paas. Madhukar ki sanse chal rahi hain vo kisi ko dekh raha hai aur kanpati aavaj men bola- r…re…k…kha… aur fir usaki bhi sanse tham gai.

Isi ghatana sthal ki ek tasvir news paper men chhapi hai aur headline hai-Rekha ne Madhukar ki shadi ki chunari ko bana diya kafan. Aur bari si khabar chhapi hai. News paper ek barah saal ki laraki ke saamane hai jo use parh rahi hai.

Name -ARCHANA YADAV

Address- THANE MAHARASHTRA

E mail ID- archanahdevi@gmail.com